हमर गंवई गॉंव

विटठराम साहू 'निश्छल'
बड़ा सुघ्घर लागे रे संगी, हमर गंवई गांव,
खेत - कोठार गंगा - तिरीथ,
नीक लागय पीपर के छांव॥ बड़ सुघ्घर लागे ....।
    जिंहा सूरूज बिहिनिया बेरा,
    लाथे सोनहा बिहान।
    चिरई - चिरगुन के चहचहई मा,
    मगन होथे लईका अउ सियान।
    नई हे कोन्हों ऊच -नीच,
सब भाई बरोबर रहिथन एके ठाँव।
बड़ सुघ्घर लागथे रे संगी, हमर गंवई गांव॥
    कका - काकी, आजीदाई,
    नता हा चलतेच हावय।
    पा लगी अऊ राम - राम,
    आदर सबके करतेच हावय॥
    कखरो संग नई दुरमत हे,
सब संग परेम भाव।
बड़ सुघ्घर लागथे रे संगी, हमर गंवई गांव॥
    अलवा - जलुवा जउन मिलगे,
    उही मां रहिथन मंगन।
    भूखन - लांघन नांगर जोतथन,
    नून - पसिया मा बुझाथन अगन॥
    सबके सुख मा हमरो सुख,
अउ सबके दुख मा हमर घाव।
बड़ सुघ्घर लागथे संगी, हमर गंवई गांव॥
    रोज बाजय ढोलक झांझ,
    पंडवानी - करमा - ददरिया।
    फाग - आलहा ला नांगर जोतत,
    गाथे हमर नगरिहा॥
    मंगलू- रामू -खोरबाहरा - चैतू,
सुख - दुख बांटे पीपर के छांव।
बड़ सुघ्घर लागथे रे संगी, हमर गंवई गांव॥
मौवहारी भाठा, महासमुन्द (छ.ग.)