छेरछेरा

गणेशराम पटेल
पूस के पुन्नी,
    सुघ्घर हे बेरा।
दान - पुन के तिहार ये संगी,
    छत्तीसगढ़ के छेरछेरा॥
परमारथ बर मांगे बर जाबो।
परहित बर काबर लजाबो॥
    मोरध्वज दानी के भुइंया।
    असनान, धियान कर जोरन पईयाँ॥
कोठी के अन ल हेरी हेरा।
    छत्तीसगढ़ के छेरछेरा॥
हरिश्चन्द ह सरबस दे दिस।
राजा बलि ह जस ल ले लिस॥
    धरम - करम के गुन ल गाईन।
    जग म नाव अम्मर कहाईन॥
हूम, धूप अऊ नरियर केरा।
    छत्तीसगढ़ के छेरछेरा॥
कन - कन म भगवान बसे हे।
जम्मों जीव ल वोहा रचे हे॥
    जियत, जियन दव, सब ल भाई।
    सतकारज हे जिनगी के कमाई॥
बनवावव इसकुल, सराय, डेरा।
    छत्तीसगढ़ के छेराछेरा॥
से . नि. शिक्षक
ग्राम व पो . - बिरकोनी
जिला - महासमुंद (छ.ग.)