बिरिज कस मोर गॉव

आनंद तिवारी पौराणिक
बरदी के लहुटती
    गली,खोर, येती वोती
    अंगला, दुआर, कुरिया, मकान
    रूख, राई, रदï्दा, रेंगान
    जम्मों धुर्रा म बोथाथें
    गईया, बछरू, अन्ते - तन्ते छरियाथे
बरदिहा ह, ह, ह,ह,ह, चिचियाथे
    बन्सी ल बजाथे
    सुरता म मोर भुलाये कन्हैया
    बिरिज कस मोर गाँव भइया
धुर्रा ह तभे चंदन कस
माथ म फबथे कन्दन अस
    जूड़ के घाम दूबर - पातर
    सूरूज नारायन जावत हे अपन घर
खोंदरा म चिरगुन - चिरई
मिटï्ठू, मैना, पड़की, सल्हई
    घूमत किंजरत, जंगल - झाड़ी
    पिला बर चारा काड़ी
हम्मा - हम्मा नरियाये, बछरू अउ गईया
सुरता आयव मयारू जसोमति मईया
    देखते - देखत दिन हा पहाथे
    घोर अंधियारी ह घबटाथे
तुलसी चउँरा म होथे दीया बाती
मंदिर - देवाला म भजन आरती
    कदम के सुघ्घर छाँव कस
    नन्द बबा के गाँव कस
मंजूर पाखी आथे अँजोर बगरईया
सुरता आये गोपी अऊ रास - रचईया
    नवा बिहाती कस
    रतिहा ह संवरथे
    पिरीत के लहरा ह,
    मन, समन्दर म संचरथे
नंदिया के धार कस,
अन्तस ह मिंझरथे
सपना के नवा अरथ
जिनगी ह पाथे
    जी, म होथे तभे छपक - छईयाँ
    राधा तिर आ जाथे,किसन - कन्हैया।
श्रीराम टाकीज मार्ग, महासमुन्द( छग. )