ऋतुआ बसंत आ गे

-  आत्माराम कोशा ' अमात्‍य ' -
ऋतुआ बसंत आ गे, रतिया के कंत आगे।
मतौना हवा धरे/  मेछरौना दवा धरे।
जन - मन म उम्हियागे।। ऋतुआ।।
आमा मउर म बइठे,
परसा फूल म पइठे।
कुसुम बान हाथ धरे,
पिंयर - पिंयर सरसों म गइठे।
माहकत दिक - दिगंत आगे।। ऋतुआ।।
कोयली के कुहकी म वो,
नंगारा .. डाहँकी म वो,
बौराये भँवरा के संग,
बतियन बाँहकी - बाँहकी म वो।
चोला उतार के संग आगे।। ऋतुआ।।
रसरस - रसरस, सुरसुर - सुरसुर
पीरा उमचे .. गुरतुर - गुरतुर।
महकत हवा/ दर्दे दिल के दवा,
गुदगुद - गुदगुद, तुरतुर - तुरतुर।
प्रेम - परछो के आदि - अंत आगे।। ऋतुआ।।
अनुप्रास अलंकार के संग,
प्रकृति के सिंगार के संग।
सबद - सबद रस - रंग बरसे,
रंग रसिया लगवार के संग
प्रसाद, निराला, पंत आगे।। ऋतुआ।।
पुराना गंज मंडी चौक, राजनांदगांव  (छग.)