बड़ हुशियार

राजकुमार मसखरे

रावन मारे बर बनगे बड़ हुशियार
सजधज के मटमट ले होगे तियार,
काली जेन हरियर बेशरम रिहिन
आज बनगे बड़ पड़री खुसियार!

नकली रावन ल नकली ह मारत हे
बता तो येला मारे के का अधिकार,
मारना हे त बने मार न रे अइबी
तोर अंतस म घुसरे रावन ल मार!

ले बता राम के, के ठन गुन हवय
रावन के गुन घलो नइ हे दू - चार,
रावन के मुड़ी तो दसे रिहिस होही
तुँहर तो चारो मुड़ा ये हवय हज़ार!

ये कागज़,पैरा भूसा के ल रहन दे
जेन छेल्ला घुमत हे तेला जोहार,
जनता के बाँटा ल जेन डकारत हे
अइसन बहुरूपिया ल धर कचार!

इँहा कइ नकली बाबा,नेता,महंत
येला सोझिया के ठाढ़ो भुर्री बार,
अब अइसन रावन ल खोज मारव
तभे ये देश ए समाज म होही सुधार!